खाट ( Haryanvi Kavita )

                            

                                         कविता      :- खाट

                             कवि         :- पवन फरैणिया

                               

 

मेरी खेत मै खाट रै घली हुई, फसलां का रहूं रूखाळी रै  

पांच किल्ले लिये ठेके पै घराँ बाट देखै घरआळी रै

उसनै गुस्से मै कई बै कह लिया वारी -सवेरी तो आज्या कर......

         मनै कुछ ना लेणा तेरे तै दो घड़ी बैठ बतलाज्या कर…मेरी खेत मै खाट रै घली हुई

दिन मै माटी गेल माटी रहवै रात की करड़ी ड्यूटी हो

फेर भी लत्ते टांगण नै घर मै कोन्या खुटी हो

रहवै फिकर मै हर टैम टुकड़ा तो ढंग तै खाज्या कर.....

          मनै कुछ ना लेणा तेरे तै दो घड़ी बैठ बतलाज्या कर…मेरी खेत मै खाट रै घली हुई

एक फसल का रहवै रूखाळी दूजी छोडी सुनी हो

सोक कहूं के घर का गुजारा अरमाना के खुनी हो

रोती फिरै मेरी जवानी कदै छाती के तो लाज्या कर....

            मनै कुछ ना लेणा तेरे तै दो घड़ी बैठ बतलाज्या कर…मेरी खेत मै खाट रै घली हुई

दिन का बेरा कोन्या पाटता भाज-दौड़  कै कट्ज्या टैम

 ईब सी आवै ईब सी आवै सारी रात रहे जा बैहम

फरैणिये ना आवै याद तेरी कोए इसी दवाई पियाज्या कर....

          मनै कुछ ना लेणा तेरे तै दो घड़ी बैठ बतलाज्या कर…मेरी खेत मै खाट रै घली हुई

माँ और बेटी ( Haryanvi Poem )

                            

                                                     कविता      :- माँ और बेटी

                                             कवि         :- पवन फरैणिया

मेरा भी दिल करै था इस दुनिया नै देखण का

   इस प्यारी सी धरती पै नन्हे कदमा नै टेकण का

      क्यूँ कोख के माह तनै फाँसी का फंदा तैयार करा

                    क्यूँ ना मेरा ऐतबार करा…..बस इतनी बात मैं पूछूँ सूं…….. 

                                                         मेरा तू माँ खोट बतादे मैं कै तेरे तै रूसुं सूं…….

                                                           हाँ साची बात बतादे माँ मैं कै तेरे तै रूसुं सूं……

       तेरे आगै-पाछै फिरती तेरे सारे कहण पुगाती माँ

 तनै खाट पै रोटी देकै फेर पाछै तै खाती माँ 

                   कै तनै ना चाहती माँ…… बस इतनी बात मैं पूछूँ सूं……..

                                                            मेरा तू माँ खोट बतादे मैं कै तेरे तै रूसुं सूं…….

                                                              हाँ साची बात बतादे माँ मैं कै तेरे तै रूसुं सूं……

 बेटी मारण आळी थाम बहु कड़े तै लाओगी

                   अपणे इन लाला नै किसकी गेल्याँ बिहाओगी                 

                              और कितना पाप कमाओगी…… बस इतनी बात मैं पूछूँ सूं……..

                                                             मेरा तू माँ खोट बतादे मैं कै तेरे तै रूसुं सूं…….

                                                              हाँ साची बात बतादे माँ मैं कै तेरे तै रूसुं सूं……

रेप (RAPE)

                            

कविता      :- रेप  (RAPE)  

कवि         :- पवन फ्रेणिया

सोचण नै मजबूर करया इस समाज नै बेटी मैं

धरती पै लाऊँ या गर्भ मै दबवा दूँ गेटी मैं…….जन्म देउँ या कोख़ मै दबवा दूँ गेटी मैं…….

                 दरिंदे भरे पड़ै सै आड़ै तनै नोच कै खाज्यांगे

                 किस-किस के पहरे देऊंगा तनै खोस कै खाज्यांगे

                 चन्दरमा से तेरे चरित्र कै दाग़ ये काला लाज्यांगे

                 पंचायती भी आखिर मै तनै गलत बताज्यांगे

इस जमाने की चाल नै देख कै सूं लाचार बेटी मैं…………

धरती पै लाऊँ या गर्भ मै दबवादूँ गेटी मैं…….जन्म देउँ या कोख़ मै दबवादूँ गेटी मैं…….

                 बच्ची, बूढ़ी, जवान आड़ै कोए ना सेफ सै

                 8 महीनै की बच्ची आड़ै होज्या रेप सै

                आज का माणस बुरे कर्मों तै होया लेप सै

                अच्छे विचारां की बेटी ना रही टेक सै

रोता कोन्या तनै देखणा चाहता बेटी मैं………

धरती पै लाऊँ या गर्भ मै दबवादूँ गेटी मैं…….जन्म देउँ या कोख़ मै दबवादूँ गेटी मैं…….

                 घर तै बाहर लिकड़ना बेटी महाभारत होज्यागी

                 लोगाँ की गलत सोच तेरी जिंदगी खोज्यागी

                 कुछ ना चारा चालै रो पिट कै सोज्यागी

                 फरैण आलै की सारे को रै -रै माटी होज्यागी

आगै कुआँ पीछै खाई कित जाऊँ बेटी मैं…….

धरती पै लाऊँ या गर्भ मै दबवादूँ गेटी मैं…….जन्म देउँ या कोख़ मै दबवादूँ गेटी मैं…….